«Կցանկանայի ապրել 10 տարի ավել, տեսնեի ինձ ավելի մեծ հասակում»
Մահից երեք ամիս առաջ արված հարցազրույցը... |
Հինգ տարի առաջ կյանքից
հեռացավ հայկական հարսանիքների, կնունքների, ծնունդների և, ընդհանրապես, բոլոր ուրախ պահերի անդավաճան ընկեր Արամ Ասատրյանը:
Դեռևս 2003թ. նրան շնորհվեց գուսանի կոչում, սակայն ժողովրդի սերն ավելի թանկ է. նա երկար տարիներ է վայելում մեծ ժողովրդականություն:
Նրա բոլոր երգերը Հայաստան են բարբառում, հայ լինելն են գովերգում: Երգեր, որոնք ծանոթ են բոլորին, որ հնչում են բոլորի շուրթերից` ուրախ, թե տխուր:
-Դուք ժողովրդական երգիչ, այնպիսի երգիչ, որին ճանաչում, սիրում են բոլորը:
-Ես ժողովրդի սերը միշտ տանում եմ ինձ հետ, միշտ անկեղծ եմ: Իմ երգերը պարզ են ու բարի, որովհետև իմ ազգն էությամբ բարի է: Մեր չարության մեջ էլ բարություն կա, մենք չարերի համար էլ աղոթող ժողովուրդ ենք: «Սուրբ Սարգիս»
երգը հենց դրա մասին է` քրիստոնեական բարության:
-Երգիչը կարող է մի օր արթնանալ և դառնալ հայտնի, իսկ Դո՞ւք:
-Մինչև 1987թ. ես ունեի 13 ձայնագրություն: Այդ թվականին ծնվեցին «Շողերով, շաղերով», «Պաղ աղբյուր» երգերը, որոնք միանգամից արձագանք ստացան և սիրվեցին:
-Ինչպե՞ս որոշեցիք երգել:
-Քույրերս, եղբայրներս երգում էին, ես էլ սկսեցի, սկսել եմ կոնֆետի թղթերով սարքած ճամբարներում երգելուց: Տարիներ հետո համոզվեցի, որ աստված ինձ փեշակ է պարգևել: Սիրով կատարում եմ ժողովրդի պատվերները. կնունքներ, ծնունդներ, հարսանիքներ, երգել եմ բոլոր գյուղերում, ցեխերի մեջ, պատերազմի տարիներին, Ազատության հրապարակում ասֆալտի վրա եմ երգել: Ես ասֆալտի երգիչ եմ, ես բեմի երգիչ չեմ, թեև եղել եմ նաև աշխարհի ամենաբարձր բեմերում, երգել եմ հանրահայտ երգիչների հետ: Արվեստագետներն իրենց համարում են աստղ, սակայն ես աստղ չեմ: Տարիներ առաջ ես ասել եմ, որ աստղը երկնքում է, ես ինչպե՞ս կարող եմ աստղ լինել:
-2003թ. Ձեզ շնորհվեց գուսանի կոչում, ի՞նչ կասեք այդ մասին:
-Այդ պարգևն իմը չէ, այլ ժողովրդինն է: Ժողովրդի կամքով եմ ես ստացել այդ մրցանակը, ուրեմն դա ապագա սերունդներինն է:
-Այդ դեպքում ի՞նչն է Ձերը:
-Իմը ես եմ, որ ժողովրդինն եմ, իմը իմ հայրենիքն է և իմ լեզուն, երգերս էլ իմը չեն: Ամենակարևորը մենք բոլորս Տիրոջ ծառաներն ենք:
-Բացի երգից էլ ի՞նչն է տեղ գրավում Ձեր կյանքում:
-Առաջինը իմ հայ լինելը, երկրորդը` իմ ընտանիքը: Մեր գուսանները ասում էին. «Միլիոն ունենայի, կտայի, որ 10 տարի ջահելանայի», բայց ես` ընդհակառակը, կցանկանայի ապրել 10 տարի ավել, տեսնեի ինձ ավելի մեծ հասակում:
Ժողովրդի մեջ տարածված շատ երգերի հեղինակը ես եմ, բայց այդ ոչ բոլորը գիտեն:
Աստծո կամքով ես գուսան եմ դարձել,
Սիրող սրտերին ճամփա եմ բացել,
Հազարավոր հարսնիք եմ երգել:
Ու մի օր պիտի երգեմ:
Երգը ծնվեց Լոռվա սիրուն սարերում,
Ես Արամն եմ` ապրող հեռու-հեռու ափերում,
Լինի Լոսում, թե Կիրովականում,
Թող միշտ ժպտան հայերը,
Այս կյանքը շատ գեղեցիկ է,
Ամուր պահեք ձեր սերը:
-Դուք ամեն ինչ պարգևում եք ժողովրդին, ի՞նչ եք ստանում որպես փոխհատուցում:
-Արդեն դեմքիցս պա՞րզ չէ. աշխարհի ամենաերջանիկ մարդն եմ: Եթե արժանանում եմ ժողովրդի ժպիտին, ծափերին, երանություն եմ ապրում: Այսօր իմ լոռեցիները նորից ապացուցեցին և պարտադրեցին, որ
Արամ, բացիր աչքերդ, նայիր աշխարհին,
Որ գիշերները մնում ես արթուն,
Սակայն երգում ես «Սեր իմ առաջին»:
Կա առաջին սեր, բայց կա նաև Աստծո սեր: Ես այս տարիքում արդեն ապրում եմ հենց այդ սերը: Արամ պապին ժողովրդին է:
-Իսկ Ձմեռ պապի՞ն:
-Ձմեռ պապիկ էլ եմ եղել, վերջերս ԱՄՆ-ում մի ֆիլմ էր նկարահանվել, որ ես Հայաստանից նվերներ պետք է տանեմ Կալիֆորնիա: Բոլոր երկրներում եղա, բացի Իտալիայից: Երբ ասում են` ինչու, ասում եմ` այնտեղ արդեն պապ կա, երկու պապ մի տեղ չի լինի:
-Ի՞նչ կմաղթեք Ձեր հանդիսատեսին:
-Ես ուզում եմ, որ հայ ժողովուրդը գիտակցի, որ մենք ապրում ենք մեր դարերի ամենալավ օրերը. ամենամեծն այն է, որ մենք ունենք պետականություն, անկախ հայրենիք: Լոռեցիների ցավը տանեմ, լավ լինեն, սիրով, բարի, լոռեցիները միամիտ չեն, այլ պարզ են:
Խղճիս առաջ միշտ մաքուր եմ ես եղել,
Մեր աշխարհում հազար երգեր եմ երգել,
Ճոխ սեղանին չեմ նախանձել ուրիշի,
Ես մի վարդ եմ. ինչո՞ւ նմանվել փշի:
Ծաղիկների բույրը կառնեմ ամեն օր,
Ես գուսան եմ, պիտի շրջեմ Լոռվա սարերով:
Հ.Գ. Քառատողերը գրվել են հարցազրույցի պահին:
No comments:
Post a Comment