ճանապարհ դեպի թագավորական պալատ

Մի քիչ թիթիզանալուց և ջրիկանալուց հետո այնուամենայնիվ որոշեցինք գտնել Հոլանդիայի թագավորական պալատը... բայց ասեմ, դա այնքան էլ հեշտ չէ: Մենք պետք է անցնեինք փորձությունների երկար ճանապարհ, գործեինք մանր-մունր լիքը սխրանքներ, հանդիպեինք վտանգավոր և ոչ այնքան կենդանիների, խուսափեինք ընկնել մեզ սպասող ծուղակները... այո, ճանապարհը դժվար էր, բայց այն արժեր անցնել, չէ որ մենք այնուամենայնիվ բացահայտելու էինք Դեն Հագում ծպտված թագավորին:

Դեն Հագի հենց սրտում գտնվող անտառի քարտեզը ասում էր, որ պալատը գտնվում է անտառում, ճահիճներով և երևի վտանգավոր թռչուններով լի էր մեր ճանապարհը: 

Մեզ սպասում էին ծպտված կենդանիներ, որոնք քարացել էին տարիներ շարունակ պահպանելու թագավորական ընտանիքի անդորրը:

Այո, Ճանապարհը զարտուղի էր և հաճախ գրեթե անանցանելի... դրա համար մենք գնում էինք նորմալ ճանապարհով, ոչ թե այս գետով:

Այս ծիտիկը այդքան միամիտ չէ, ինչքան առաջին հայացքից թվում է, նա նորին գերազանցության բանբերն է, սակայն մենք դա ավելի ուշ իմացանք, երբ արդեն չափազանց ուշ էր:

 Բայց դեռ փորձություններն առջևում էին, պետք էր կտրել անցնել պարանով կամուրջը, փայտե տախտակներով պատրաստված արահետը... դժվար էր, բայց մենք անխոնջ էինք ու համառ:

ևս մեկ ճահիճ մնաց հետևում

Այո, մենք պատրաստ էինք ամեն տեսակի փորձության

 Որպեսզի հասնենք նորին գերազանցությանը... Նորին գերազանցությո՞ւն!!!! Ես Ձեզ մի քիչ այլ կերպ էի պատկերացնում:

 Չէէէ, արդեն խառնել ենք ամեն ինչ, բայց ոնց որ թե ճահիճում գտնվող տեսախցիկից կարելի է եզրակացնել, որ շաաատ ենք մոտեցել պալատին:

Ահա և բաղձալի պալատը...

 Որը այդպես էլ մնաց բաղձալի...

Աշխարհի ամենահետաքրքիր անտառը- The most interesting forest in the world

Աշխարհի ամենահետաքրքիր անտառը ես, բնականաբար, գտա Նիդեռլանդներում: Այստեղ չկային թռչող գետաձիներ կամ խոսացող ընձուղտներ, ոչ, այն ամենասովորական վայրի անտառն էր, բայց միայն առաջին հայացքից: Ամեն անգամ անտառով քայլելիս (այն գտնվում էր մեր աշխատանքի և բնակվելու վայրերի մեջտեղում, ես կասեի՝ այն կլանել էր ամբողջ շրջապատը) ես հիանում էի վայրի բնության հիանալի պահպանությամբ. ծառի արմատախիլ բներ, վայրի հատապտուղների թփեր, ծառասնկեր, եղնիկներ, որոնց տեսնելու համար պետք էր շաաատ բախտավոր լիներ (դե մենք բախտավորներից էինք:)):  Բայց... մի օր մի բնիկ հոլանդացի մեզ պատմեց այդ բնական գեղեցկության հիմքում ընկած ամբողջ ճշմարտությունը...

Սա ամենաթանկ կամուրջն է Նիդեռլանդներում,
այն հատուկ պատրաստված է կենդանիների համար

Անտառի մուտքի ցանցը պաշտպանում է եղնիկներին,
որ նրանք դուրս չգան փողոց

Անտառում կարելի է տեսնել միայն հեծանվորդների,
 հա, մեկ էլ մեզ՝ հետիոտներիս

Արմատախիլ ծառերը հատուկ են տեղադրված այստեղ, որ
կենդանիների համար ստեղծեն իրենց հարազատ միջավայրը

Կոճղերը թողած են հատուկ ծառասնկերի համար

Նստարանը մարդկանց համար է)

Հիշո՞ւմ եք ամենաթանկ կամուրջը: Սա էլ իր մուտքն է

Կամուրջի վրա կենդանիները չեն զգում
 բարձրությունն ու մեքենաների աղմուկը
հատուկ տնկված վայրի հատապտուղների թփերի պատճառով

Իսկ սա գետնանցում,, ըըը,,, գորտնանցում է,
որպեսզի գորտերը մեքենաների տակ չընկնեն

Սարդերի խրախճանքը կարելի է տեսնել միայն վաղ առավոտյան,
գրեթե լուսաբացին...

... երբ հասկանում ես, որ այս անտառում, մեկ է, դու հյուր ես...