Երեխաներ, երեխաներ

Ոչ մի երեխա չպետք է տխրի և աշխատի... մանավանդ այսօր

Եթե կախարդական փայտիկ ունենայի...

«Սաղ տիեզերքը իմս լիներ»,-պաղպաղակ ուտելով ասում է փոքրիկ Գարիկը հարցին, թե ինչ կցանկանար, եթե կախարդական փայտիկ ունենար:

Էլինան երազում է պարող դառնալ, իսկ նրա քույր 7-ամյա Միլենան ամաչելով ասաց. «Ուզում եմ թռչել»:

8-ամյա Ամիլեն մեծի նման պատասխանեց. «Չար մարդկանց բարի դարձնեի, որ մեր երկիրը ամենալավը լինի, և մարդիկ երբեք չչարանան»:

Կատրինը և Դավիթը, իրենց ձեռքին պատկերացնելով կախարդական փայտիկը, սկսեցին «կախարդել»: «Հաղթեմ, լավ կարատեիստ դառնամ»,-ասաց Դավիթը:

Փոքրիկ Կատրինը մի քանի անգամ ասաց` ես կուզեի..., ապա շփոթվեց. «Չգիտեմ` ինչ ասեմ»: Բայց հետո որոշեց. «Ուզում եմ շատ փուչիկներ ունենալ»:

 Կատրինի և Դավիթի հետևում կանգնած 8-ամյա Տիգրանը դասը լավ սովորած աշակերտի պես ձեռք բարձրացրեց. «Կուզեմ ամենաուժեղ ֆուտբոլիստը դառնալ»:

6-ամյա Վիկան կուզենար ձի ունենալ, ինչը շատ զարմացրեց նրա ուղեկից տատիկին:

9-ամյա Սեդան էլ երազում է, «Կուզեմ հարսի շոր ունենալ»: 12 տարեկան Լյուբիկը աշխարհին խաղաղություն մաղթեց, իսկ նրա քույրիկը` 10-ամյա Ռոզան, ցանկացավ շատ խաղահրապարակներ կառուցել երեխաների համար:

«Բոլորին կսպանեմ»,- նեղացած ասաց 5-ամյա Մհերը` փուչիկը ձեռքին:

Մազերը հարդարելով, լավ տեղավորվելով նստարանին` 8-ամյա Տաթևիկը սկսեց կախարդել. «Կկախարդեի, որ մի հետաքրքիր այգի լիներ, ու մարդկանց կբաժանեի պաղպաղակներ»: